रसुवा जिल्लाको उत्तरी भेगमा अवस्थित तत्कालीन गाउँ विकास समिति गोल्जुङ, गत्लाङ, चिलिमे र थुमनलाई समेट्ने गरी  २०२२ सालमा गोल्जुङ प्राथमिक विद्यालयका रूपमा यस विद्यालयको स्थापना भएको थियो । स्थानीय बुढापाहरूका अनुसार उक्त समयमा भक्तपूर जिल्ला घर भएका होम प्रसाद प्रधानङ्ग नामका शिक्षकले उमेरगत तथा कक्षागत रूप नछुट्याई सबै विद्यार्थीहरूलाई गाउँको तत्कालीन वडा नम्बर ३ स्थित सार्वजनिक भवनमा राखी पठन पाठन गराउने गर्दथे । यसरी स्थापना भएको विद्यालयले विभिन्न कालखण्डमा आर्थिक भौतिक तथा अन्य विविध समस्याहरू झेल्दै २०३४ सालमा गोल्जुङ नि.मा.वि. र वि. सं. २०४६ देखि माध्यामिक तहको रूपमा सञ्चालनको स्वीकृति पाएको थियो । माध्यामिक तहको स्वीकृति पाउने क्रममा  पुरानो नाम परिवर्तन गरी यस क्षेत्रको प्रसिद्ध धार्मिक तीर्थस्थल पार्वती कुण्डको नामबाट विद्यालयको नाम पार्वतीकुण्ड माध्यामिक विद्यालय राखिएको थियो । यस विद्यालयले २०६९ सालदेखि कक्षा १२ सम्मको अध्यापन अनुमति पाई यस क्षेत्रमा शैक्षिक नेतृत्व प्रदान गरिरहेको छ ।